aab-o-dana tera ai bulbul-e-zar uThta hai
fasl-e-gul jati hai saman-e-bahaar uThta hai
shaiKH bhi muztarib-ul-haal pahunch jata hai
jaanib-e-mai-kada jab abr-e-bahaar uThta hai
marhaba bar-e-amanat ke uThane wale
kya kaleja hai tumhaara ki ye bar uThta hai
KHar-e-sahra-e-mohabbat ki khaTak kya kahiye
jab qadam uThta hai apna sar-e-KHar uThta hai
du-e-ah-e-dil-e-sozan hai 'mubarak' apna
jo dhuan shama se balin-e-mazar uThta hai
Ghazal
Aab-o-dana tera ai bulbul-e-zar uThta hai
Mubarak Azimabadi