itna sach bol ki honTon ka tabassum na bujhe
raushni KHatm na kar aage andhera hoga

Nida Fazli

---

---

samjha hai haq ko apne hi jaanib har ek shaKHs
ye chand us ke sath chala jo jidhar gaya

Pandit Daya Shankar Naseem lakhnavi

---

---

main sach kahungi magar phir bhi haar jaungi
wo jhuT bolega aur la-jawab kar dega

Parveen Shakir

---

---

waqia kuchh bhi ho sach kahne mein ruswai hai
kyun na KHamosh rahun ahl-e-nazar kahlaun

Shahzad Ahmad

---

---

aasmanon se farishte jo utare jaen
wo bhi is daur mein sach bolen to mare jaen

Ummeed Fazli

---

---