koi nalan koi giryan koi bismil ho gaya
us ke uThte hi digar-gun rang-e-mahfil ho gaya

Abul Kalam Azad

---

---

jaane kya mahfil-e-parwana mein dekha us ne
phir zaban khul na saki shama jo KHamosh hui

Aleem Masroor

---

---

uTh ke us bazm se aa jaana kuchh aasan na tha
ek diwar se nikla hun jo dar se nikla

Aleem Masroor

---

---

shab-e-visal hai gul kar do in charaghon ko
KHushi ki bazm mein kya kaam jalne walon ka

Dagh Dehlvi

---

---

mujh tak us mahfil mein phir jam-e-sharab aane ko hai
umr-e-rafta palTi aati hai shabab aane ko hai

Fani Badayuni

---

---

tumhaari bazm se nikle to hum ne ye socha
zamin se chand talak kitna fasla hoga

Kafeel Aazar Amrohvi

---

---

fareb-e-saqi-e-mahfil na puchhiye 'majruh'
sharab ek hai badle hue hain paimane

Majrooh Sultanpuri

---

---