fursat-e-kar faqat chaar ghaDi hai yaro
ye na socho ki abhi umr paDi hai yaro

Jaan Nisar Akhtar

---

---

mai-kasho aage baDho tishna-labo aage baDho
apna haq manga nahin jata hai chhina jae hai

Kaif Bhopali

---

---

saya hai kam khajur ke unche daraKHt ka
ummid bandhiye na baDe aadmi ke sath

Kaif Bhopali

---

---

meri hi jaan ke dushman hain nasihat wale
mujh ko samjhate hain un ko nahin samjhate hain

Lala Madhav Ram Jauhar

---

---

main akela hi chala tha jaanib-e-manzil magar
log sath aate gae aur karwan banta gaya

Majrooh Sultanpuri

---

---

hayat le ke chalo kaenat le ke chalo
chalo to sare zamane ko sath le ke chalo

Makhdoom Mohiuddin

---

---

are duniya mein raho gham-zada ya shad raho
aisa kuchh kar ke chalo yan ki bahut yaad raho

Mir Taqi Mir

---

---