le ke KHat un ka kiya zabt bahut kuchh lekin
thartharaate hue hathon ne bharam khol diya

Jigar Moradabadi

---

---

wan se aaya hai jawab-e-KHat koi suniyo to zara
main nahin hun aap main mujh se na samjha jaega

Jurat Qalandar Bakhsh

---

---

kaise manen ki unhen bhul gaya tu ai 'kaif'
un ke KHat aaj hamein tere sirhane se mile

Kaif Bhopali

---

---

us ne ye kah kar pher diya KHat
KHun se kyun tahrir nahin hai

Kaif Bhopali

---

---

apna KHat aap diya un ko magar ye kah kar
KHat to pahchaniye ye KHat mujhe gumnam mila

Kaifi Hyderabadi

---

---

KHat likha yar ne raqibon ko
zindagi ne diya jawab mujhe

Lala Madhav Ram Jauhar

---

---

mera hi KHat us shoKH ne bheja mere aage
aaKHir jo likha tha wahi aaya mere aage

Lala Madhav Ram Jauhar

---

---