kya mila arz-e-muddaa se 'figar'
baat kahne se aur baat gai

Figar Unnavi

---

---

dil sabhi kuchh zaban par laya
ek faqat arz-e-muddaa ke siwa

Hafeez Jalandhari

---

---

kaT gai ehtiyat-e-ishq mein umr
hum se izhaar-e-muddaa na hua

Hasrat Mohani

---

---

mujh se nafrat hai agar us ko to izhaar kare
kab main kahta hun mujhe pyar hi karta jae

Iftikhar Naseem

---

---

izhaar-e-haal ka bhi zariya nahin raha
dil itna jal gaya hai ki aankhon mein nam nahin

Ismail Merathi

---

---

dil pe kuchh aur guzarti hai magar kya kije
lafz kuchh aur hi izhaar kiye jate hain

Jaleel u0027Aaliu0027

---

---

ek din kah lijiye jo kuchh hai dil mein aap ke
ek din sun lijiye jo kuchh hamare dil mein hai

Josh Malihabadi

---

---