main jag jag ke kis kis ka intizar karun
jo log ghar nahin pahunche wo mar gae honge

Irfan Sattar

---

---

diwar-o-dar pe KHun ke chhinTe hain ja-ba-ja
bikhra hua hai rang-e-hina tere shahar mein

Kaif Azimabadi

---

---

is qadar main ne sulagte hue ghar dekhe hain
ab to chubhne lage aankhon mein ujale mujh ko

Kamil Bahzadi

---

---

ye kaun aag lagane pe hai yahan mamur
ye kaun shahr ko maqtal banane wala hai

Khurshid Rabbani

---

---

dekhoge to har moD pe mil jaengi lashen
DhunDoge to is shahr mein qatil na milega

Malikzada Manzoor Ahmad

---

---

jo dil ko hai KHabar kahin milti nahin KHabar
har subh ek azab hai aKHbar dekhna

Obaidullah Aleem

---

---

jale makanon mein bhut baiThe baDi matanat se sochte hain
ki jangalon se nikal ke aane ki kya zarurat thi aadmi ko

Parkash Fikri

---

---