udas aankhon se aansu nahin nikalte hain
ye motiyon ki tarah sipiyon mein palte hain

Bashir Badr

---

---

aansu meri aankhon mein hain nale mere lab par
sauda mere sar mein hai tamanna mere dil mein

Bekhud Badayuni

---

---

wo aks ban ke meri chashm-e-tar mein rahta hai
ajib shaKHs hai pani ke ghar mein rahta hai

Bismil Sabri

---

---

naseh ne mera haal jo mujh se bayan kiya
aansu Tapak paDe mere be-iKHtiyar aaj

Dagh Dehlvi

---

---

ashkon ke nishan parcha-e-sada pe hain qasid
ab kuchh na bayan kar ye ibarat hi bahut hai

Ehsan Ali Khan

---

---

meri ek umr aur ek ahd ki tariKH raqam hai jis par
kaise rokun ki wo aansu meri aaankhon se gira jata hai

Farhat Ehsas

---

---

sitaron se shab-e-gham ka to daman jagmaga uThTha
magar aansu baha kar hijr ke maron ne kya paya

Farooq Banspari

---

---