kabhi KHushbu kabhi saya kabhi paikar ban kar
sabhi hijron mein visalon mein mere pas raho

Akbar Ali Khan Arshi Zadah

---

---

lao ek lamhe ko apne-ap mein Dub ke dekh aaun
KHud mujh mein hi mera KHuda ho ye bhi to ho sakta hai

Akbar Ali Khan Arshi Zadah

---

---

luTa jo us ne mujh ko to aabaad bhi kiya
ek shaKHs rahzani mein bhi rahbar laga mujhe

Akbar Ali Khan Arshi Zadah

---

---

main tujh ko bhul na paun yahi saza hai meri
main apne-ap se leta hun intiqam apna

Akbar Ali Khan Arshi Zadah

---

---

mere tasawwur ne baKHshi hai tanhai ko bhi ek mahfil
tu mahfil mahfil tanha ho ye bhi to ho sakta hai

Akbar Ali Khan Arshi Zadah

---

---

sar-e-KHar se sar-e-sang se jo hai mera jism lahu lahu
kabhi tu bhi to mere sang-e-mil kabhi rang mere safar ke dekh

Akbar Ali Khan Arshi Zadah

---

---

surahi-e-mai-e-nab-o-safina-ha-e-ghazal
ye harf-e-husn-e-muqaddar likha hai kis ke liye

Akbar Ali Khan Arshi Zadah

---

---