jin safinon ne kabhi toDa tha maujon ka ghurur
us jagah Dube jahan dariya mein tughyani na thi

Malikzada Manzoor Ahmad

---

---

kash daulat-e-gham hi apne pas bach rahti
wo bhi un ko de baiThe aisi mat khai hai

Malikzada Manzoor Ahmad

---

---

khil uThe gul ya khile dast-e-hinai tere
har taraf tu hai to phir tera pata kis se karen

Malikzada Manzoor Ahmad

---

---

KHwab ka rishta haqiqat se na joDa jae
aaina hai ise patthar se na toDa jae

Malikzada Manzoor Ahmad

---

---

kuchh gham-e-jaanan kuchh gham-e-dauran donon meri zat ke nam
ek ghazal mansub hai us se ek ghazal haalat ke nam

Malikzada Manzoor Ahmad

---

---

kya jaaniye kaisi thi wo hawa chaunka na shajar patta na hila
baiTha tha main jis ke sae mein 'manzur' wahi diwar giri

Malikzada Manzoor Ahmad

---

---

na KHauf-e-barq na KHauf-e-sharar lage hai mujhe
KHud apne bagh ke phulon se Dar lage hai mujhe

Malikzada Manzoor Ahmad

---

---