kyun aaina kahen use patthar na kyun kahen
jis aaine mein aks na us ka dikhai de

Krishn Bihari Noor

---

---

main jis ke hath mein ek phul de ke aaya tha
usi ke hath ka patthar meri talash mein hai

Krishn Bihari Noor

---

---

sach ghaTe ya baDhe to sach na rahe
jhuT ki koi intiha hi nahin

Krishn Bihari Noor

---

---

tishnagi ke bhi maqamat hain kya kya yani
kabhi dariya nahin kafi kabhi qatra hai bahut

Krishn Bihari Noor

---

---

wo to ghazal suna ke akela khaDa raha
sab apne apne chahne walon mein kho gae

Krishn Bihari Noor

---

---

yahi milne ka samay bhi hai bichhaDne ka bhi
mujh ko lagta hai bahut apne se Dar sham ke baad

Krishn Bihari Noor

---

---

zindagi se baDi saza hi nahin
aur kya jurm hai pata hi nahin

Krishn Bihari Noor

---

---