Thaharna bhi mera jaana shumar hone laga
paDe paDe main purana shumar hone laga

Azhar Faragh

---

---

us se hum puchh thoDi sakte hain
us ki marzi jahan rakhe jis ko

Azhar Faragh

---

---

use kaho jo bulata hai gahre pani mein
kinare se bandhi kashti ka masala samjhe

Azhar Faragh

---

---

waise to iman hai mera un banhon ki gunjaish par
dekhna ye hai us kashti mein kitna dariya aa jata hai

Azhar Faragh

---

---

wasl ke ek hi jhonke mein
kan se baale utar gae

Azhar Faragh

---

---

wo dastiyab hamein is liye nahin hota
hum istifada nahin dekh-bhaal karte hain

Azhar Faragh

---

---

ye e'timad bhi mera diya hua hai tumhein
jo mere mashware be-kar jaane lag gae hain

Azhar Faragh

---

---