nind ban kar meri aankhon se mere KHun mein utar
rat-jaga KHatm ho aur raat mukammal ho jae

Waheed Akhtar

---

---

kirnon se tarasha hua ek nur ka paikar
sharmaya hua KHwab ki chaukhaT pe khaDa hai

Waheed Akhtar

---

---

lete hain tera nam hi yun jagte sote
jaise ki hamein apna KHuda yaad nahin hai

Waheed Akhtar

---

---

mangne walon ko kya izzat o ruswai se
dene walon ki amiri ka bharam khulta hai

Waheed Akhtar

---

---

masjid ho madrasa ho ki majlis ki mai-kada
mahfuz shar se kuchh hai to ghar hai chale-chalo

Waheed Akhtar

---

---

meri uDan agar mujh ko niche aane de
to aasman ki gahrai mein utar jaun

Waheed Akhtar

---

---

umr bhar milte rahe phir bhi na milne pae
is tarah mil ki mulaqat mukammal ho jae

Waheed Akhtar

---

---

zer-e-pa ab na zamin hai na falak hai sar par
sail-e-taKHliq bhi girdab ka manzar nikla

Waheed Akhtar

---

---

yaad aai na kabhi be-sar-o-samani mein
dekh kar ghar ko gharib-ul-watani yaad aai

Waheed Akhtar

---

---