sath hone ke yaqin mein bhi mere sath ho tum
aur na hone ke bhi imkan mein rakkha hai tumhein

Tariq Qamar

---

---

main chahta hun kabhi yun bhi ho ki meri tarah
wo mujh ko DhunDne nikle magar na pae mujhe

Tariq Qamar

---

---

mere zaKHmon ka sabab puchhegi duniya tum se
main ne har zaKHm ki pahchan mein rakkha hai tumhein

Tariq Qamar

---

---

mizaj apna mila hi nahin zamane se
na main hua kabhi is ka na ye zamana mera

Tariq Qamar

---

---

phir aaj bhuk hamara shikar kar legi
ki raat ho gai dariya mein jal Dale hue

Tariq Qamar

---

---

wo log bhi to kinaron pe aa ke Dub gae
jo kah rahe the samundar hain sab khangale hue

Tariq Qamar

---

---

zehn par bojh raha, dil bhi pareshan hua
in baDe logon se mil kar baDa nuqsan hua

Tariq Qamar

---

---

ye kis ki pyas ke chhinTe paDe hain pani par
ye kaun jabr ka qissa tamam kar aaya

Tariq Qamar

---

---

kya ajab log the guzre hain baDi shan ke sath
raste chup hain magar naqsh-e-qadam bolte hain

Tariq Qamar

---

---