pahle chadar ki hawas mein panw phailae bahut
ab ye dukh hai panw kyun chadar se bahar aa gaya

Sajjad Baqar Rizvi

---

---

phir zehn ki galiyon mein sada gunji hai koi
phir soch rahe hain kahin aawaz suni hai

Sajjad Baqar Rizvi

---

---

phirti thi le ke shorish-e-dil ku-ba-ku hamein
manzil mili to shorish-e-dil ka pata na tha

Sajjad Baqar Rizvi

---

---

saman-e-dil ko be-sar-o-samaniyan milin
kuchh aur bhi jawab the mere sawal ke

Sajjad Baqar Rizvi

---

---

shahr ke aabaad sannaTon ki wahshat dekh kar
dil ko jaane kya hua main sham se ghar aa gaya

Sajjad Baqar Rizvi

---

---

TuT paDti thin ghaTaen jin ki aankhen dekh kar
wo bhari barsat mein tarse hain pani ke liye

Sajjad Baqar Rizvi

---

---

zulfen idhar khulin adhar aansu umanD paDe
hain sab ke apne apne rawabit ghaTa ke sath

Sajjad Baqar Rizvi

---

---