قدم ہے عین حدوث اور حدوث عین قدم
جو تو نہ جلوہ میں آتا تو میں کہاں ہوتا

ساحر دہلوی

---

---

کیا شوق کا عالم تھا کہ ہاتھوں سے اڑا خط
دل تھام کے اس شوخ کو لکھنے جو لگا خط

ساحر دہلوی

---

---

میں دیوانہ ہوں اور دیر و حرم سے مجھ کو وحشت ہے
پڑی رہنے دو میرے پاؤں میں زنجیر مے خانہ

ساحر دہلوی

---

---

مل ملا کے دونوں نے دل کو کر دیا برباد
حسن نے کیا بے خود عشق نے کیا آزاد

ساحر دہلوی

---

---

نقش قدم ہیں راہ میں فرہاد و قیس کے
اے عشق کھینچ کر مجھے لایا ادھر کہاں

ساحر دہلوی

---

---

پابندئ احکام شریعت ہے وہاں فرض
رندوں کو رخ ساقی و ساغر ہوئے مخصوص

ساحر دہلوی

---

---

تھا انا الحق لب منصور پہ کیا آپ سے آپ
تھا جو پردے میں چھپا بول اٹھا آپ سے آپ

ساحر دہلوی

---

---

یوں تو ہر دین میں ہے صاحب ایماں ہونا
ہم کو اک بت نے سکھایا ہے مسلماں ہونا

ساحر دہلوی

---

---

وا ہوتے ہیں مستی میں خرابات کے اسرار
رندی مرا ایمان ہے مستی ہے مرا فرض

ساحر دہلوی

---

---