na ab wo shiddat-e-awargi na wahshat-e-dil
hamare nam ki kuchh aur shohraten bhi gain

Sahar Ansari

---

---

sada apni rawish ahl-e-zamana yaad rakhte hain
haqiqat bhul jate hain fasana yaad rakhte hain

Sahar Ansari

---

---

shayad ki wo waqif nahin aadab-e-safar se
pani mein jo qadmon ke nishan DhunD raha tha

Sahar Ansari

---

---

shikwa-e-talKHi-e-haalat baja hai lekin
is pe rota hun ki main ne bhi rulaya hai tujhe

Sahar Ansari

---

---

tang aate bhi nahin kashmakash-e-dahr se log
kya tamasha hai ki marte bhi nahin zahr se log

Sahar Ansari

---

---

teri aarzu se bhi kyun nahin gham-e-zindagi mein koi kami
ye sawal wo hai ki jis ka ab koi ek jawab nahin raha

Sahar Ansari

---

---

ye marna jina bhi shayad majburi ki do lahren hain
kuchh soch ke marna chaha tha kuchh soch ke jina chaha hai

Sahar Ansari

---

---