kuchh parindon ko to bas do chaar dane chahiyen
kuchh ko lekin aasmanon ke KHazane chahiyen

Rajesh Reddy

---

---

sab log is se pahle ki dewta samajhte
hum ne zara sa KHud ko insan kar liya hai

Rajesh Reddy

---

---

safar mein ab ke ajab tajraba nikal aaya
bhaTak gaya to naya rasta nikal aaya

Rajesh Reddy

---

---

sham ko jis waqt KHali hath ghar jata hun main
muskura dete hain bachche aur mar jata hun main

Rajesh Reddy

---

---

soch lo kal kahin aansu na bahane paD jaen
KHun ka kya hai ragon mein wo yunhi khaulta hai

Rajesh Reddy

---

---

wo dil se kam zaban hi se ziyaada baat karta tha
jabhi us ke yahan gahrai kam wusat ziyaada thi

Rajesh Reddy

---

---

ya KHuda ab ke ye kis rang mein aai hai bahaar
zard hi zard hai peDon pe hara kuchh bhi nahin

Rajesh Reddy

---

---

yahan har shaKHs har pal hadsa hone se Darta hai
khilauna hai jo miTTi ka fana hone se Darta hai

Rajesh Reddy

---

---

ye jo zindagi ki kitab hai ye kitab bhi kya kitab hai
kahin ek hasin sa KHwab hai kahin jaan-lewa azab hai

Rajesh Reddy

---

---