aaftab-e-garm se dast-o-gareban ho gae
dhup ki shiddat se sae jab pareshan ho gae

Mahfuzur Rahman Adil

---

---

hamesha dhup ki chadar pe takiya kaun karta hai
khuli chhat hai to phir barsat ka bhi samna hoga

Mahfuzur Rahman Adil

---

---

hawa ke rahm-o-karam par hun be-Thikana hun
shajar se TuTa hua ek zard patta hun

Mahfuzur Rahman Adil

---

---

jannaten to peshwaon ne hi mil kar banT lin
hum ko uljhaya gaya hai dozaKHon ke darmiyan

Mahfuzur Rahman Adil

---

---

jo teri zulf ke sae mein chand din guzre
wo gham ki dhup mein yaad aae saeban ki tarah

Mahfuzur Rahman Adil

---

---

KHud mere aansu chamak rakhte hain gauhar ki tarah
meri chashm-e-arzu mein mah-o-aKHtar kuchh nahin

Mahfuzur Rahman Adil

---

---

kyun zamana hi badalta hai tujhe
tu zamane ko badalta kyun nahin

Mahfuzur Rahman Adil

---

---

mat baiTh aashiyan mein paron ko sameT kar
kar hausla kushada faza mein uDan ka

Mahfuzur Rahman Adil

---

---

mera zahir dekhne wale mera baatin bhi dekh
ghar ke bahar hai ujala ghar ke andar kuchh nahin

Mahfuzur Rahman Adil

---

---