koi charag jalata nahin saliqe se
magar sabhi ko shikayat hawa se hoti hai

Khurshid Talab

---

---

ki hum bane hi na the ek dusre ke liye
ab is yaqin ko jina hayat karte hue

Khurshid Talab

---

---

aaiye bich ki diwar gira dete hain
kab se ek masala be-kar mein uljha hua hai

Khurshid Talab

---

---

kahin bhi jaen kisi shahr mein sukunat ho
hum apni tarz ki aab o hawa banate hain

Khurshid Talab

---

---

kabhi dimagh ko KHatir mein hum ne laya nahin
hum ahl-e-dil the hamesha rahe KHasare mein

Khurshid Talab

---

---

hawa to hai hi muKHalif mujhe Daraata hai kya
hawa se puchh ke koi diye jalata hai kya

Khurshid Talab

---

---

hawa se kah do ki kuchh der ko Thahar jae
KHajil hamari ibarat hawa se hoti hai

Khurshid Talab

---

---

har ek ahd ne likkha hai apna nama-e-shauq
kisi ne KHun se likha hai kisi ne aansu se

Khurshid Talab

---

---

hamein har waqt ye ehsas daman-gir rahta hai
paDe hain Dher sare kaam aur mohlat zara si hai

Khurshid Talab

---

---