garm aansu aur ThanDi aahen man mein kya kya mausam hain
is baghiya ke bhed na kholo sair karo KHamosh raho

Ibn e Insha

---

---

aan ke is bimar ko dekhe tujh ko bhi taufiq hui
lab par us ke nam tha tera jab bhi dard shadid hua

Ibn e Insha

---

---

ek din dekhne ko aa jate
ye hawas umr bhar nahin hoti

Ibn e Insha

---

---

dil hijr ke dard se bojhal hai ab aan milo to behtar ho
is baat se hum ko kya matlab ye kaise ho ye kyunkar ho

Ibn e Insha

---

---

dida o dil ne dard ki apne baat bhi ki to kis se ki
wo to dard ka bani Thahra wo kya dard baTaega

Ibn e Insha

---

---

ekal bekal rahte ho par mahfil ke aadab ke sath
aankh chura kar dekh bhi lete bhole bhi ban jate ho

Ibn e Insha

---

---

e tere kya wahshat hum ko tujh bin kaisa sabr o sukun
tu hi apna shahr hai jaani tu hi apna sahra hai

Ibn e Insha

---

---

apni zaban se kuchh na kahenge chup hi rahenge aashiq log
tum se to itna ho sakta hai puchho haal bechaaron ka

Ibn e Insha

---

---

apne hamrah jo aate ho idhar se pahle
dasht paDta hai miyan ishq mein ghar se pahle

Ibn e Insha

---

---