dil-e-betab ka andaz-e-bayan hai warna
shukr mein kaun si shai hai jo shikayat mein nahin

Anand Narayan Mulla

---

---

ek ek lamhe mein jab sadiyon ki sadiyan kaT gain
aisi kuchh raaten bhi guzri hain meri tere baghai

Anand Narayan Mulla

---

---

farq jo kuchh hai wo mutrib mein hai aur saz mein hai
warna naghma wahi har parda-e-awaz mein hai

Anand Narayan Mulla

---

---

aaina-e-rangin jigar kuchh bhi nahin kya
kya husn hi sab kuchh hai nazar kuchh bhi nahin kya

Anand Narayan Mulla

---

---

gham-e-hayat sharik-e-gham-e-mohabbat hai
mila diye hain kuchh aansu meri sharab ke sath

Anand Narayan Mulla

---

---

had-e-takmil ko pahunchi teri ranai-e-husn
jo kasar thi wo miTa di teri angDai ne

Anand Narayan Mulla

---

---

hum ne bhi ki thin koshishen hum na tumhein bhula sake
koi kami hamin mein thi yaad tumhein na aa sake

Anand Narayan Mulla

---

---

har ek surat pe dhoka kha rahi hain teri surat ka
abhi aata nahin nazron ko ta-hadd-e-nazar jaana

Anand Narayan Mulla

---

---

husn ke jalwe nahin muhtaj-e-chashm-e-arzu
shama jalti hai ijazat le ke parwane se kya

Anand Narayan Mulla

---

---