sailab umanD ke shahar ki galiyon mein aa gae
lekin gharib-e-shahr ka daman na tar hua

Akhtar Hoshiyarpuri

---

---

thi titliyon ke taaqub mein zindagi meri
wo shahr kya hua jis ki thi har gali meri

Akhtar Hoshiyarpuri

---

---

tamam harf mere lab pe aa ke jam se gae
na jaane main kaha kya aur us ne samjha kya

Akhtar Hoshiyarpuri

---

---

Takra ke sar ko apna lahu aap chaTte
achchha hua ki dasht mein diwar-o-dar na the

Akhtar Hoshiyarpuri

---

---

shayad apna hi taaqub hai mujhe sadiyon se
shayad apna hi tasawwur liye jata hai mujhe

Akhtar Hoshiyarpuri

---

---

sar pe tufan bhi hai samne girdab bhi hai
meri himmat ki wahi kachcha ghaDa hai dekho

Akhtar Hoshiyarpuri

---

---

nikal kar aa gae hain jangalon mein
makan ko la-makan karna paDa hai

Akhtar Hoshiyarpuri

---

---

meri gali ke makin ye mere rafiq-e-safar
ye log wo hain jo chehre badalte rahte hain

Akhtar Hoshiyarpuri

---

---

na jaane log Thaharte hain waqt-e-sham kahan
hamein to ghar mein bhi rukne ka hausla na hua

Akhtar Hoshiyarpuri

---

---