phir wahi lambi do-pahren-surmai hain phir wahi dil ki haalat hai
bahar kitna sannaTa hai andar kitni wahshat hai
Aitbar Sajid
pahle gham-e-furqat ke ye tewar to nahin the
rag rag mein utarti hui tanhai to ab hai
Aitbar Sajid
muKHtalif apni kahani hai zamane bhar se
munfarid hum gham-e-haalat liye phirte hain
Aitbar Sajid
mujhe apne rup ki dhup do ki chamak saken mere KHal-o-KHad
mujhe apne rang mein rang do mere sare rang utar do
Aitbar Sajid
meri poshak to pahchan nahin hai meri
dil mein bhi jhank meri zahiri haalat pe na ja
Aitbar Sajid
makinon ke talluq hi se yaad aati hai har basti
wagarna sirf baam-o-dar se ulfat kaun rakhta hai
Aitbar Sajid
main takiye par sitare bo raha hun
janam-din hai akela ro raha hun
Aitbar Sajid
ab to KHud apni zarurat bhi nahin hai hum ko
wo bhi din the ki kabhi teri zarurat hum the
Aitbar Sajid
kise pane ki KHwahish hai ki 'sajid'
main rafta rafta KHud ko kho raha hun
Aitbar Sajid