pyar apne pe jo aata hai to kya karte hain
aaina dekh ke munh chum liya karte hain

Ahmad Husain Mail

---

---

main hi momin main hi kafir main hi kaba main hi dair
KHud ko main sajde karunga dil mein tum ho dil mein tum

Ahmad Husain Mail

---

---

sari KHilqat rah mein hai aur ho manzil mein tum
donon aalam dil se bahar hain faqat ho dil mein tum

Ahmad Husain Mail

---

---

tauba khaDi hai dar pe jo fariyaad ke liye
ye mai-kada bhi kya kisi qazi ka ghar hua

Ahmad Husain Mail

---

---

tum gale mil kar jo kahte ho ki ab had se na baDh
hath to gardan mein hain hum panw phailaenge kya

Ahmad Husain Mail

---

---

tum ko malum jawani ka maza hai ki nahin
KHwab hi mein kabhi kuchh kaam hua hai ki nahin

Ahmad Husain Mail

---

---

wada kiya hai ghair se aur wo bhi wasl ka
kulli karo huzur hua hai dahan KHara

Ahmad Husain Mail

---

---

waiz ka e'tiraaz ye but hain KHuda nahin
mera ye e'tiqad ki jalwe KHuda ke hain

Ahmad Husain Mail

---

---

wo bazm mein hain rote hain ushshaq chau taraf
pani hai gird-e-anjuman aur anjuman mein aag

Ahmad Husain Mail

---

---