Taujih

to kya dekhta hun
faza nur hi nur thi

pahaD apne andar se phuTe hue dard
se jal raha tha

paDosi samundar sunahra hua tha
bashaarat mili thi

nanon, kahinon ke barhana hujum
dahne hath mein apne gham

aur baen mein apne sawal
aur ranon mein ghoDon ki piThen pahan kar

nikal aae the
raushni ki taraf

KHamushi se baDhe ja rahe the
KHunuk aur hairan aankhon se

Takra ke wapas palaTti shuaon se
andhi chaTanon ke KHam jal uThe the

to kya dekhta hun
wo choTi ke pas

pahunch kar larazne lage the
dhamaka hua tha

ajab ek sayyal malghuba
in ki taraf baDh raha tha

isi tel mein bhig ke
ek zaitun ka peD

mishal bana jal raha tha