magar tang-nazar
maTiyale talab mein
us adh-khile kanwal par
wo bahaar thi
jo dekhne wali aankhon mein dhanak khilati hai
phir pani ka bulawa alag tha
is sahirana kashish se haar kar
apna tahmad utar kar
wo murda pani mein kud paDe
jal-kumbhi se uljhe
to hafte ashre ke hamal ke manind
narm aur KHam saron wale
gul guthne
(sadakar meDakon ke
dum-dar bachche)
shark lahron ke shor
se Dar ke
farfar har taraf bhag khaDe hue
aur sher-imdad-ali galle galle pani mein the
aur kanwal dur tha
bijli chamki
aur ek dum-dar aab-KHor
us ghubare ki surat se
jis mein hawa bhari ho
aur hath se chhuT jae
chhipkili ki talwar zaban ki tarah
san san karta hua
un ke khule munh ki surang mein utar gaya
din guzre
aur mausam badle
aur jug bit gae
ek aawaz taaqub karti rahti hai:
bahar aane do
is zindan se bahar aane do
darjanon Doctron aur sarjanon ke
xray ki KHunuk shuaon se
jal kar dekh liya
shahr badal kar
mulk badal kar dekh liya
magar lahu mein
wahi sada halkore leti hai
bahar aane do
is zindan se bahar aane do
sher-imdad-ali pani ki amanat ghasb kiye
apne ghar mein zanjir hue baiThe hain
bahar pani khaDa hai
aur pani mein
pipal ke patton ki tarah
sale
KHashmagin aankhon wale
pile pile meDak
apna ghera Dale
paDe hue hain
Nazm
Sher-imdad-ali ka meDak
Saqi Faruqi