zikr aae to mere lab se duaen niklen
shama jalti hai to lazim hai shuaen niklen
waqt ki zarb se kaT jate hain sab ke sine
chand ka chhilka utar jae to qashen niklen
dafn ho jaen ki zarKHez zamin lagti hai
kal isi miTTi se shayad meri shaKHen niklen
chand ummiden nichoDi thin to aahen Tapkin
dil ko pighlaen to ho sakta hai sansen niklen
ghaar ke munh pe rakha rahne do sang-e-KHurshid
ghaar mein hath na Dalo kahin raaten niklen
Ghazal
Zikr aae to mere lab se duaen niklen
Gulzar