zaKHmon ko rafu kar len dil shad karen phir se
KHwabon ki koi duniya aabaad karen phir se
muddat hui jine ka ehsas nahin hota
dil un se taqaza kar bedad karen phir se
mujrim ke kaTahre mein phir hum ko khaDa kar do
ho rasm-e-kohan taza fariyaad karen phir se
ai ahl-e-junun dekho zanjir hue sae
hum kaise unhen socho aazad karen phir se
ab ji ke bahalne ki hai ek yahi surat
biti hui kuchh baaten hum yaad karen phir se
Ghazal
ZaKHmon ko rafu kar len dil shad karen phir se
Shahryar