waqt ka qafila aata hai guzar jata hai
aadmi apni hi manzil mein Thahar jata hai
ek bigDi hui qismat pe na hansna ai dost
jaane kis waqt ye insan sanwar jata hai
is taraf aish ki shamen to udhar dil ke charagh
dekhna ye hai ki parwana kidhar jata hai
jam-o-sahba ki mujhe fikr nahin ai gham-e-dil
mera paimana to ashkon hi se bhar jata hai
ek rishta bhi mohabbat ka agar TuT gaya
dekhte dekhte shiraaza bikhar jata hai
haal mere liye hai lamha-e-ainda 'nushur'
waqt shaer ke liye pahle guzar jata hai
Ghazal
Waqt ka qafila aata hai guzar jata hai
Nushur Wahidi