Thikana hai kahin jaen kahan na-chaar baiThe hain
ijazat jab nahin dar ki pas-e-diwar baiThe hain
ye matlab hai ki mahfil mein manae aur man jaen
wo mere chheDne ko ghair se bezar baiThe hain
KHaridar aa rahe hain har taraf se naqd-e-jaan le kar
wo yusuf ban ke bikne ko sar-e-bazar baiThe hain
achanak le na lun bosa ye khaTka un ke dil mein hai
mere pahlu mein baiThe hain magar hoshyar baiThe hain
tumhaare aashiqon mein be-qarari kya hi phaili hai
jidhar dekho jigar thame hue do-chaar baiThe hain
qayamat hai sitam murde pe bhi un ko gawara hai
mera lasha uThane ke liye aghyar baiThe hain
lab-e-baam aa ke dikhla wo tamasha tur ka tum bhi
baDe mauqe se dar par talib-e-didar baiThe hain
'asar' kyun-kar na jaanun us ke dar ko qibla-e-alam
usi jaanib kai ruKH kafir o din-dar baiThe hain
Ghazal
Thikana hai kahin jaen kahan na-chaar baiThe hain
Imdad Imam Asar