niyyat-e-shauq bhar na jae kahin
tu bhi dil se utar na jae kahin
aaj dekha hai tujh ko der ke baad
aaj ka din guzar na jae kahin
na mila kar udas logon se
husn tera bikhar na jae kahin
aarzu hai ki tu yahan aae
aur phir umr bhar na jae kahin
ji jalata hun aur sochta hun
raegan ye hunar na jae kahin
aao kuchh der ro hi len 'nasir'
phir ye dariya utar na jae kahin
Ghazal
Niyyat-e-shauq bhar na jae kahin
Nasir Kazmi