nind raaton ki uDa dete hain
hum sitaron ko dua dete hain
roz achchhe nahin lagte aansu
KHas mauqon pe maza dete hain
ab ke hum jaan laDa baiThenge
dekhen ab kaun saza dete hain
hae wo log jo dekhe bhi nahin
yaad aaen to rula dete hain
di hai KHairaat usi dar se kabhi
ab usi dar pe sada dete hain
aag apne hi laga sakte hain
ghair to sirf hawa dete hain
kitne chaalak hain KHuban 'alwi'
hum ko ilzam-e-wafa dete hain
Ghazal
Nind raaton ki uDa dete hain
Mohammad Alvi