main zaKHm kha ke gira tha ki tham us ne liya
muaf kar ke mujhe intiqam us ne liya
main so gaya to koi nind se uTha mujh mein
phir apne hath mein sab intizam us ne liya
kabhi bhulaya kabhi yaad kar liya us ko
ye kaam hai to bahut mujh se kaam us ne liya
na jaane kis ko pukara gale laga ke mujhe
magar wo mera nahin tha jo nam us ne liya
bahaar aai to phulon se un ki KHushbu li
hawa chali to hawa se KHiram us ne liya
fana ne kuchh nahin manga sawal karte hue
isi ada pe KHuda se dawam us ne liya
Ghazal
Main zaKHm kha ke gira tha ki tham usne liya
Faisal Ajmi