koi to phul khilae dua ke lahje mein
ajab tarah ki ghuTan hai hawa ke lahje mein
ye waqt kis ki raunat pe KHak Dal gaya
ye kaun bol raha tha KHuda ke lahje mein
na jaane KHalq-e-KHuda kaun se azab mein hai
hawaen chiKH paDin iltija ke lahje mein
khula fareb-e-mohabbat dikhai deta hai
ajab kamal hai us bewafa ke lahje mein
yahi hai maslahat-e-jabr-e-ehtiyat to phir
hum apna haal kahenge chhupa ke lahje mein
Ghazal
Koi to phul khilae dua ke lahje mein
Iftikhar Arif