Kisi ke waste kya kya hamein dukh jhelne honge

kisi ke waste kya kya hamein dukh jhelne honge
shabon ko jagna hoga kaDe din kaTne honge

teri sangin fasilon ko to jumbish tak nahin aai
hawaen le uDin jin ko wo apne jhonpaDe honge

bhanwar tak to koi aaya nahin mere liye lekin
main bach nikla to sahil par kai bazu khule honge

KHizan ka zahr sare shahr ki rag rag mein utra hai
gali-kuchon mein ab to zard chehre dekhne honge

hamein duniya ki gardish ye tamasha bhi dikhaegi
gharon mein tirgi hogi munDeron par diye honge

koi daulat nahin 'imdad' apne dast o daman mein
faqat yaadon ke sikke dil tijori mein rakhe honge