دل ہوا ہے مرا خراب سخن
دیکھ کر حسن بے حجاب سخن
بزم معنی میں سر خوشی ہے اسے
جس کوں ہے نشۂ شراب سخن
راہ مضمون تازہ بند نہیں
تا قیامت کھلا ہے باب سخن
جلوہ پیرا ہو شاہد معنی
جب زباں سوں اٹھے نقاب سخن
گوہر اس کی نظر میں جا نہ کرے
جن نے دیکھا ہے آب و تاب سخن
ہرجا گویاں کی بات کیونکہ سنے
جو سنا نغمۂ رباب سخن
ہے تری بات اے نزاکت فہم
لوح دیباچۂ کتاب سخن
ہے سخن جگ منیں عدیم المثال
جز سخن نیں دجا جواب سخن
اے ولیؔ درد سر کبھو نہ رہے
جب ملے صندل و گلاب سخن
غزل
دل ہوا ہے مرا خراب سخن
ولی محمد ولی