dil se uThta hai subh-o-sham dhuan
koi rahta hai is makan mein abhi

Anjum Rumani

---

---

dil sulagta hai tere sard rawayye se mera
dekh ab barf ne kya aag laga rakkhi hai

Anwar Masood

---

---

sirf us ke honT kaghaz par bana deta hun main
KHud bana leti hai honTon par hansi apni jagah

Anwar Shuoor

---

---

KHwabon ke ufuq par tera chehra ho hamesha
aur main usi chehre se nae KHwab sajaun

Athar Nafees

---

---

agar talash karun koi mil hi jaega
magar tumhaari tarah kaun mujh ko chahega

Bashir Badr

---

---

itni milti hai meri ghazlon se surat teri
log tujh ko mera mahbub samajhte honge

Bashir Badr

---

---

mahak rahi hai zamin chandni ke phulon se
KHuda kisi ki mohabbat pe muskuraya hai

Bashir Badr

---

---