kamal-e-ishq hai diwana ho gaya hun main
ye kis ke hath se daman chhuDa raha hun main
Asrar-ul-Haq Majaz
taskin-e-dil-e-mahzun na hui wo sai-e-karam farma bhi gae
is sai-e-karam ko kya kahiye bahla bhi gae taDpa bhi gae
Asrar-ul-Haq Majaz
tere mathe pe ye aanchal to bahut hi KHub hai lekin
tu is aanchal se ek parcham bana leti to achchha tha
Asrar-ul-Haq Majaz
tumhin to ho jise kahti hai naKHuda duniya
bacha sako to bacha lo ki Dubta hun main
Asrar-ul-Haq Majaz
waqt ki sai-e-musalsal kargar hoti gai
zindagi lahza-ba-lahza muKHtasar hoti gai
Asrar-ul-Haq Majaz
ya to kisi ko jurat-e-didar hi na ho
ya phir meri nigah se dekha kare koi
Asrar-ul-Haq Majaz
ye aana koi aana hai ki bas rasman chale aae
ye milna KHak milna hai ki dil se dil nahin milta
Asrar-ul-Haq Majaz
ye mere ishq ki majburiyan maaz-allah
tumhaara raaz tumhin se chhupa raha hun main
Asrar-ul-Haq Majaz
aap ki maKHmur aankhon ki qasam
meri mai-KHwari abhi tak raaz hai
Asrar-ul-Haq Majaz