jo ye hindostan nahin hota
to ye urdu zaban nahin hoti

Abdul Salam

---

---

wo kare baat to har lafz se KHushbu aae
aisi boli wahi bole jise urdu aae

Ahmad Wasi

---

---

Dal de jaan maani mein wo urdu ye hai
karwaTen lene lage taba wo pahlu ye hai

Akbar Allahabadi

---

---

shahd-o-shakar se shirin urdu zaban hamari
hoti hai jis ke bole miThi zaban hamari

Altaf Hussain Hali

---

---

'mulla' bana diya hai ise bhi mahaz-e-jang
ek sulh ka payam thi urdu zaban kabhi

Anand Narayan Mulla

---

---

jo dil bandhe wo jadu jaanta hai
mera mahbub urdu jaanta hai

Anis Dehlavi

---

---

han mujhe urdu hai punjabi se bhi baDh kar aziz
shukr hai 'anwar' meri sochen ilaqai nahin

Anwar Masood

---

---