kaj-kulahi pe na maghrur hua kar itna
sar utar aate hain shahon ke bhi dastar ke sath

Saleem Siddiqui

---

---

kaun sa jurm KHuda jaane hua hai sabit
mashware karta hai munsif jo gunahgar ke sath

Saleem Siddiqui

---

---

KHaridne ke liye us ko bik gaya KHud hi
main wo hun jis ko munafe mein bhi KHasara hua

Saleem Siddiqui

---

---

KHauf aankhon mein meri dekh ke chingari ka
kar diya raat ne suraj ke hawale mujh ko

Saleem Siddiqui

---

---

umr bhar jis ke liye peT se bandhe patthar
ab wo gin gin ke khilata hai niwale mujh ko

Saleem Siddiqui

---

---

zaKHm-dar-zaKHm suKHan aur bhi hota hai wasia
ashk-dar-ashk ubharti hai qalamkar ki gunj

Saleem Siddiqui

---

---