jo ba-KHabar the wo dete rahe fareb mujhe
tera pata jo mila ek be-KHabar se mila

Akhtar Muslimi

---

---

ajib uljhan mein tu ne Dala mujhe bhi ai gardish-e-zamana
sukun milta nahin qafas mein na ras aata hai aashiyana

Akhtar Muslimi

---

---

insaf ke parde mein ye kya zulm hai yaro
dete ho saza aur KHata aur hi kuchh hai

Akhtar Muslimi

---

---

har shaKH-e-chaman hai afsurda har phul ka chehra pazhmurda
aaghaz hi jab aisa hai to phir anjam-e-bahaaran kya hoga

Akhtar Muslimi

---

---

han ye bhi tariqa achchha hai tum KHwab mein milte ho mujh se
aate bhi nahin gham-KHane tak wada bhi wafa ho jata hai

Akhtar Muslimi

---

---

fareb-KHurda hai itna ki mere dil ko abhi
tum aa chuke ho magar intizar baqi hai

Akhtar Muslimi

---

---

ek hi anjam hai ai dost husn o ishq ka
shama bhi bujhti hai parwanon ke jal jaane ke baad

Akhtar Muslimi

---

---

di us ne mujh ko jurm-e-mohabbat ki wo saza
kuchh be-qusur log saza mangne lage

Akhtar Muslimi

---

---

dehat ke basne wale to iKHlas ke paikar hote hain
ai kash nai tahzib ki rau shahron se na aati ganw mein

Akhtar Muslimi

---

---